தென்னிந்திய சினிமாவில் விரைவாக வளர்ந்து வரும் நடிகைகளில் ஒருவரான ருக்மினி வசந்த், தற்போது ஜூனியர் என்டிஆர் மற்றும் இயக்குனர் பிரசாந்த் நீல் இணைந்து உருவாக்கும் மிகப்பெரிய திரைப்படமான ‘டிராகன்’ படத்தில் கதாநாயகியாக நடித்து வருகிறார். சமீபத்தில் வெளியான படத்தின் க்ளிம்ப்ஸ் வீடியோவில் அவரது தோற்றம் மற்றும் நடிப்புத்திறன் ரசிகர்களிடம் மிகுந்த வரவேற்பைப் பெற்றது.
இந்நிலையில், அவரது பெயரில் சில ஆட்சேபனையான புகைப்படங்கள் மற்றும் வீடியோக்கள் சமூக வலைத்தளங்களில் வேகமாகப் பரவ தொடங்கின. குடும்பத்தினர் மத்தியில் நல்ல அங்கீகாரம் பெற்ற நடிகையின் இந்த ‘மாற்றம்’ பலரையும் குழப்பத்திற்கு உள்ளாக்கியது.
எனினும், நடிகை ருக்மினி வசந்த் உடனடியாக களத்தில் இறங்கி உண்மையை வெளிப்படுத்தினார். பரவிய புகைப்படங்கள் மற்றும் வீடியோக்கள் அனைத்தும் செயற்கை நுண்ணறிவு (AI) தொழில்நுட்பத்தைப் பயன்படுத்தி உருவாக்கப்பட்ட முற்றிலும் போலியான உள்ளடக்கங்கள் என்று அவர் தெளிவுபடுத்தினார்.
“என் பெயரில் பரப்பப்படும் இந்த உள்ளடக்கங்கள் போலியானவை; இது என் தனியுரிமையை நேரடியாக மீறுகிறது. இந்த சம்பவம் தொடர்பாக சைபர் கிரைம் போலீசில் புகார் அளிக்கப்பட்டுள்ளது. இதை யாரும் பகிரவோ, ஆதரிக்கவோ வேண்டாம்” என்று அவர் உறுதியான குரலில் தெரிவித்துள்ளார்.
டீப்ஃபேக் மற்றும் AI தொழில்நுட்பங்களை தவறான நோக்கில் பயன்படுத்தி பெண்களை இலக்கு வைக்கும் சம்பவங்கள் நாளுக்கு நாள் அதிகரித்து வருகின்றன. ருக்மினி வசந்தின் இந்த துணிச்சலான நடவடிக்கை, இத்தகைய சைபர் குற்றங்களை சகித்துக்கொள்ளாமல் எதிர்த்து நிற்க வேண்டும் என்ற செய்தியை வலுவாக உணர்த்துகிறது.
